P48-M shabu samsam sa buy-bust!
Drug trafficker natimbog
MANILA, Philippines — Umiskor ang anti-drug operatives makaraang maaresto ang isang pinaghihinalaang bigtime drug trafficker na nagresulta sa pagkakasamsam ng pitong kilo ng shabu na nagkakahalaga ng P48 milyon sa buy-bust operation sa isang subdibisyon sa Mandaue City, Cebu nitong Biyernes ng gabi.
Sa ulat ng Mandaue City Police, kinilala ang nasakoteng suspek na si Charlie Fortuna, 24-anyos.
Bandang alas-11 ng gabi nang isagawa ang anti-drug operation laban kay Fortuna sa subdibisyon sa lugar kung saan nagpapatayo ang suspek ng bagong bahay na nagkakahalaga ng P17 milyon.
Nabatid na isang undercover agent ang nakipag-deal at bibili ng 25 gramo ng shabu sa suspek. Habang iniaabot ang droga, tinanong ng poseur buyer si Fortuna kung marami pa siyang supply kaya sinabi ng suspek na pumunta sila sa isang bahay sa nasabing subdibisyon kung saan nito itinatago ang mga droga na kanyang ibinebenta.
Tatlong kilo pa ng shabu ang ipinakita ng suspek sa poseur buyer bunsod upang arestuhin ito. Nang halughugin ang bahay nito ay tumambad pa ang maraming droga na umaabot lahat sa 7 kilo na may katumbas na halagang P48 milyon.
- Latest