4 ‘pusher’ tumba sa buy-bust
NUEVA ECIJA , Philippines — Apat na hinihinalang drug pusher ang nasawi makaraang umano’y manlaban sa pulisya sa magkakahiwalay na buy-bust operations sa lalawigan noong Pebrero 6 at 7.
Sa ulat ng tanggapan ni P/Senior Supt. Leon Victor Rosete, Nueva Ecija Police Provincial director, nakilala ang apat na suspek na nasawi sa tatlong magkakahiwalay na buy-bust operations na sina Rodel Sibayan, 45-anyos, may-asawa, isang construction worker ng Brgy. D.S. Garcia, Cabanatuan City, Nueva Ecija; Roel Hipolito, 44, may-asawa ng Brgy. San Fernando Sur, Cabiao; Adel Roll Milan ng San Isidro, Nueva Ecija, at isa pang lalaki na inaalam ang pangalan.
Nasawi si Hipolito sa engkuwentro noong Pebrero 6, bandang alas-7:30 ng gabi sa Brgy. San Fernando Sur, Cabiao sa buy-bust ng Cabiao Police.
Bumulagta naman si Sibayan nang manlaban umano sa mga kagawad ng San Leonardo Police sa Nagaño St., Brgy. Mambangnan, San Leonardo, bandang alas-5:20 ng umaga noong Pebrero 7. Narekober dito ang isang caliber 38 revolver, isang P500 bill at isang plastic sachet ng shabu.
Napatay din si Milan at isa pang ‘di kilalang lalaki ng Gapan City Police sa buy-bust operation sa Brgy. Sto. Cristo Norte, Gapan City bandang alas-4 ng madaling-araw noong Peb. 7.
- Latest