Tourist bus salpok sa trak: 5 utas
42 sugatan
MANILA, Philippines — Lima ang nasawi habang 42 ang sugatan matapos sumalpok ang isang tourist bus sa sinusundan nitong trailer truck sa kahabaan ng Subic-Clark-Tarlac Expressway (SCTEX), sa Concepcion, Tarlac, nitong Huwebes ng umaga.
Dead-on-arrival sa Concepcion District Hospital sa Tarlac ang mga biktimang sina Ruel Castillo, Ricardo Aledia, Isidro Brabante at Laila Abita, mga tourist guide, pawang mga taga-Naic, Cavite, habang ang isa pa ay binawian naman ng buhay sa Medical City sa Clark, Pampanga sanhi ng malubhang sugat na tinamo sa katawan.
Patuloy namang nilalapatan ng lunas ang iba pang pasahero na nasugatan na dinala sa iba’t-ibang pagamutan na malapit sa pinangyarihan ng aksidente.
Sinabi ni Supt. Redentor Ulsano, officer-in-charge ng Concepcion Police, dakong alas- 5:10 ng umaga nang mangyari ang aksidenteng banggaan ng Jumbo tourist bus (BEK 523) na minamaneho ni Michael Sangcajo, 37, ng Bacoor, Cavite at Foton truck (conduction sticker GB7764) na may trailer (MV 100525 na minamaneho naman ni Antonio Bulante ng Caloocan City sa kahabaan ng SCTEX sa Brgy. Santiago, Concepcion, ng lalawigan.
Sa ulat, galing umano sa Naic, Cavite ang nasabing bus sakay ang mga empleyado ng lokal na pamahalaan na patungong Baguio City para dumalo sa seminar.
Sa pahayag ng ilan sa mga nakaligtas, pagiwang-giwang umano ang takbo ng bus bago ito sumalpok sa sinusundang trak.
Sa lakas ng pagkakabangga ay nagtamo ng matinding pinsala ang bus na nawasak ang unahang bahagi na ikinasawi ng limang na biktima at ikinasugat pa ng ibang pasahero.
Lumilitaw sa imbestigasyon na posibleng nakatulog ang driver ng bus dahilan upang sumalpok ito sa hulihang bahagi ng truck.
- Latest