2 ‘tulak’ utas sa buy-bust
CABANATUAN CITY, Nueva Ecija , Philippines — Dalawang hinihinalang tulak ng droga ang napatay sa buy-bust operation ng Drug Enforcement Unit ng Cabanatuan Police kasama ang Philippine Drug Enforcement Agency (PDEA) Regional Office 3 sa Purok 2, Brgy. Sta. Arcadia, noong Linggo ng madaling-araw.
Sa report ni P/Supt. Ponciano Zafra, hepe ng pulisya sa lungsod, nakilala ang mga nasawi na sina Francis Faustino alias Kiko, 39, binata, ng Brgy. Tagpos, Sta. Rosa, Nueva Ecija at isang lalaki na nakilala lang sa alyas “Toper”.
Sa imbestigasyon, bandang alas-3:20 ng madaling-araw nang isagawa ang buy-bust laban sa mga suspek. Nakatunog umano ang dalawa na pulis ang kanilang katransaksyon kaya nila pinaputukan. Hindi naman tinamaan ang mga pulis na gumanti ng putok na ikinabulagta ng mga suspek.
Narekober sa lugar ang isang kalibre .45 pistola, isang kalibre .38 revolver, dalawang P500 bill, 15 plastic sachet ng pinaniniwalaang shabu, isang Kawasaki Bajaj tricycle, isang van na Hyundai Starex (RNF 855), 6 cartridge para sa caliber .9mm, at isang cartridge para sa cal .45.
- Latest
