Pahinante hulog sa trak, lasog

PALAYAN CITY  , Philippines  —  Isang pahinante ang nasawi makaraang mahulog mula sa likuran ng trak at mabagok ang ulo sa sementadong kalsada sa sa Barangay Singalat ng lungsod na ito, noong Huwebes ng tanghali.  Agad na isinugod sa Palayan City Integrated Health Office ng mga tauhan ng Palayan City Rescue team ang biktima na si Manuel Aris Fajardo, 23, may-asawa at truck helper ng Brgy. Santolan ng lungsod, pero idineklarang dead-on-arrival. Sa ulat, alas-12:40 ng tanghali habang nakasakay ang biktima sa likuran ng isang Isuzu Elf truck (AAT-4205) na minamaneho ni Jonell Rivera at patungo umano sa Nueva Ecija-Aurora Road, nang mawalan umano ng balanse at mahulog ang una sa kalsada nang hindi man lang umano napansin ng nasabing driver. Napansin na lamang ang nakahandusay na biktima ng mga sumunod na dumaang motorista.