Kawani ng lending firm utas sa holdap, 1 sugatan
MANILA, Philippines — Patay ang isang kawani ng isang lending firm habang sugatan ang isa pang kasama nito matapos silang holdapin ng mga suspek na sakay ng motorsiklo sa Purok Bagras, Brgy. Koronadal, Proper Polomolok, Polomolok, South Cotabato, kamakalawa.
Kinilala ng Polomolok Police na pinamumunuan ni Police Supt. Marvin Duadua ang nasawing biktima na si Vlademer Paciente, 38-anyos, nakatira sa Brgy. Maltana, Tampakan, South Cotabato habang ang sugatan ay si Carlo Laurio, 27, ng Brgy. Klinan, Polomolok.
Ang dalawa na pawang mga kawani ng Community Economic Ventures Inc. ay hinarang ng tatlong suspek habang lulan ng kanilang motorsiklo pagsapit sa Purok Bagras, Brgy. Coronadal, Proper Polomolok, alas-3:00 ng hapon. Isa sa mga suspek ang biglang lumapit at binaril ng dalawang beses ang driver na si Paciente na ideklarang dead-on-arrival sa ospital.
Masuwerte namang tinamaan lamang ng bala sa kanyang kaliwang siko ang angkas na si Luario at nakalabas na ng ospital.
Natangay ng mga suspek ang mahigit P40,000 na koleksyon ng mga biktima at kanilang kulay itim at pulang Honda XRM 125 motorcycle.
Narekober ng mga pulis sa crime scene ang isang bala at dalawang basyo ng 45 pistol. Hindi pa nila batid ang pagkakakilanlan ng mga tumakas na hold upper.
- Latest