Tserman inutas habang nagbabaraha

STA. ROSA, Nueva Ecija, Philippines — Patay ang 61-anyos na chairman ng Barangay La Fuente ng bayang ito makaraang pagbabarilin ng ri­ding-in-tandem habang naglalaro ng baraha sa balkonahe ng isang bahay sa nasasakupan nitong barangay noong Biyernes ng gabi.

Kinilala ni P/Chief Inspector Steven dela Cruz, hepe ng Sta. Rosa Police ang biktimang si Rene Sebastian na binawian ng buhay habang nilalapatan ng lunas sa Nueva Ecija Doctors Hospital sa Cabanatuan City.

Base sa report, isang bala mula sa kalibre. 45 baril ang tumama sa kaliwang balakang ng biktima na tumagos sa atay nito sanhi ng kanyang kamatayan.

Bandang 6:45 ng gabi, nakaupo umano ang biktima sa pasimano ng balkonahe ng bahay ng isang Marlon Adriano habang nakikipaglaro ng baraha nang biglang paputukan ng apat na beses ng isa sa suspek na halos nasa tatlong metro lang ang layo.

Agad na tumakas ang riding-in-tandem suspect lulan ng isang hindi naplakahang motorsiklo matapos ang pagpatay.

Si Sebastian ang kauna-unahang biktima ng pamamaril sa hanay ng mga pulitiko rito sa lalawigan simula nang mag-umpisa ang election period noong Ene­ro 13, 2019 kung saan ipinatupad din ang gun ban sa buong bansa kaugnay ng idaraos na midterm elections sa May 13, ngayong taon.