Lider ng ‘robbery group’ arestado
RIZAL , Philippines — Arestado ang sinasabing lider ng isang notoryus na “robbery group” na itinuturing na No. 8 Most Wanted Person (MWP) sa lalawigang ito sa isinagawang operasyon kamakalawa.
Kinilala ni Rizal Provincial Director P/Senior Supt. Lou Frias Evangelista ang suspek na si Rudy Senobio, 34, at residente ng Sitio Buluran, Brgy. Dalig, Cardona, Rizal.
Nabatid na si Senobio ay isa sa lider ng “Senobio Group” na sangkot sa iba’t ibang criminal activities gaya ng pagpatay, pagnanakaw at illegal drug trade, at nag-o-operate sa Cardona at iba pang kalapit na munisipalidad.
Sa ulat ng Rizal Police Provincial Office (RPPO), dakong alas-4:00 ng hapon nang maaresto ang suspek sa Magsaysay Street, Brgy. Bayugo, Jala-Jala, ng pinagsanib na puwersa ng Intel/Warrant operatives ng Provincial Intelligence Branch ng RPPO, Jala-Jala at Cardona Municipal Police Stations.
Hindi na pumalag ang suspek nang arestuhin ng mga awtoridad sa bisa ng warrant of arrest sa kasong murder na inisyu laban sa kanya ni Judge Ma. Conchita Lucero-De Mesa ng Binangonan RTC 4th Judicial Region, Branch 70 noong Agosto 31, 2018.
- Latest
