Davao fire: 2 sugatan, P2-M naabo
MANILA, Philippines — Nasa anim na boarding house at 34 pang kabahayan ang nilamon ng apoy sa magkahiwalay na sunog sa Davao, ayon sa pulisya kahapon.
Base sa unang report, umaabot sa P2 milyon ang naabo sa sunog sa anim na boarding house sa Roxas Extension malapit sa University of Mindanao Digos College, sa Digos City, Davao del Sur, kahapon ng madaling araw.
Ayon kay Chief Insp. Joycelyn Grant, city fire marshall, nagsimula ang sunog alas-2:55 ng madaling araw sa kusina o dirty kitchen sa compound ng boarding house na pag-aari ni Danny Agravante. Ang mga bahay ay gawa lamang sa light materials sanhi upang mabilis na kumalat ang apoy.
Mabilis na rumesponde sa lugar ang mga pamatay-sunog mula sa Filipino-Chinese firefighters, Aplaya sub-station at mga kalapit na bayan ng Padada at ideneklarang fire-out dakong alas-4:15 ng madaling araw kahapon.
Samantala, dalawa katao ang nasugatan na kinilalang sina Dante Tubig at Jessie Garcia, 59, makaraang sumiklab ang sunog na tumupok sa may 34 na kabahayan sa Toril District nitong Martes ng hapon.
Ayon kay Fire Chief Insp. Virnalita Silagan, acting Davao City Fire marshal, kabilang sa mga nilamon ng apoy ay ang bahay nina Tubig at Garcia sanhi ng kanilang pagkasugat nang magliyab ang mga kabahayan sa may Waling-waling Street, Barangay Daliao, Davao City dakong 12:52 ng hapon.
- Latest