8-anyos totoy nalunod sa ilog!
Dahil sa inanod na tsinelas
LEGAZPI CITY Albay , Philippines — Nalunod ang isang 8-anyos na totoy matapos habulin nito ang inanod na tsinelas habang naglalaro sa ilog sa Resettlement Site, Brgy. Taysan, ng lungsod na ito kamakalawa ng umaga.
Patay na nang matagpuan ng ilang residente ang palutang-lutang na biktima na si Justin Jayden Alemania, Grade 3 pupil at residente sa nasabing barangay, sa Macabalo River sa Brgy. Dapdap.
Sa ulat, dakong alas-9:30 ng umaga, habang nagtatampisaw ang biktima at ilang kalaro sa tabi ng ilog nang anurin ng malakas na agos ng tubig ang tsinelas nito. Sinubukang habulin ng bata ang tsinelas pero pati siya ay tinangay ng agos hanggang sa lamunin ng tubig.
Gayunman, dahil sa sobrang takot, hindi nagsabi ang mga kalaro ng bata sa mga magulang ng biktima at sa halip nagkanya-kanya silang uwi na lamang sa kanilang bahay.
Kinaumagahan, nagsumbong sa buong pangyayari ang mga kalaro ng bata nang hinahanap na ang biktima ng magulang hanggang sa matagpuang patay ito sa dulo ng ilog.
- Latest