19 sasakyan inararo ng trak: 6 patay!
MANILA, Philippines — Anim na katao ang patay, kabilang ang dalawang bata nang mawalan ng preno at araruhin ng isang 14-wheeler truck ang 19 sasakyan bago ito sumalpok sa isang panaderya at bahay sa Sta. Rosa City, Laguna kamakalawa ng gabi.
Kinilala ni Laguna Police chief P/Senior Supt. Eleazar Matta ang mga namatay na sina Lorelyn Rosel Sumadsad, 22; ang magkapatid na sina Jerome, 17, at Jayson Baluya, 25; Quelah Ayesha Velasco, 1-anyos; Juvelyn Floresco Delizo, 21, at 2-taong gulang na anak na si Ariane Kaye Yllera, pawang ng Sitio Kawad, Brgy. Sto. Domingo.
Ginagamot naman sa ospital ang 14 pang sugatan kabilang sina Magdaleno Sumadsad, ang buntis na si Laiza Castillo; Reynalyn de Guzman; Ronaldo Serrano Sr.; Ronalyn Serrano; Mark Ariel Dignos; Sarah May Dignos; Jerwin Baluya; Juanito Marquez; Ker Luis Garcia, 12-anyos; Fherlyn Jane Delizo; Rodel Esquera; John Paul Bautista; at Aileen Vallestero.
Batay sa ulat ni PO3 Daniel Bahiwag, dakong alas-11:30 ng gabi nang maganap ang aksidente sa Sta. Rosa-Tagaytay road sa Brgy. Sto. Domingo. May mga sakay na metal bearings ang naturang truck na minamaneho ni Anthony Bernardo, na mula sa Dasmariñas City, Cavite, at mabilis ang takbo nang biglang mawalan ng preno. Sanhi nito, inararo ng trak ang may 19 na mga sasakyan, na noon ay mabagal umano ang takbo dahil sa traffic at may mga tao pang mula sa Nuvali, na isang kilalang shopping at commercial district sa Sta. Rosa.
Bumangga pa ang truck sa isang panaderya at isang bahay bago ito tuluyang huminto.
Nabatid na kabilang sa mga namatay sa insidente ay mga natutulog sa loob ng bakery habang ang iba naman ay naglalakad lamang sa gilid ng kalsada.
Matapos ang insidente, tumakas ang driver ng trak na ngayo’y tinutugis na ng pulisya.
- Latest
