Guwardya na ‘tulak’ utas sa shootout
LEGAZPI CITY, Albay, Philippines — Bulagta ang isang 56-anyos na security guard na suma-sideline pa sa pagtutulak ng droga matapos makipagbarilan sa mga pulis na aaresto sana sa kanya sa ginawang buy-bust operation sa Purok-1,Brgy. Pamorangon sa bayan ng Daet, Camarines Norte noong Biyernes ng madaling araw.
Sinubukan pang isugod ng mga operatiba sa Camarines Norte Provincial Hospital pero dineklarang dead-on-arrival ang suspek na kinilalang si Rodrigo Huerta Copino, ng Purok-4, nasabing barangay.
Sa ulat, dakong alas-12:20 ng madaling araw nang ilatag ng magkasanib na puwersa ng Provincial Intelligence Branch, Camarines Norte Provincial Office at Daet Police sa pangunguna ni Supt. Bernett Nabunat ang buy-bust operation laban sa suspek. Gayunman, nakahalata si Copino na pulis ang kanyang katransaksyon kaya bumunot siya ng baril at pinutukan ang poseur buyer. Agad namang gumanti ng putok ang nakatagong mga operatiba dahilan para duguang bumulagta ang suspek. Ligtas naman ang pulis na poseur buyer dahil sa suot na bullet proof vest.
Nakuha sa suspek ang 9 na sachet ng hinihinalang shabu, buy bust money at ang kalibre 38 baril.
- Latest