Bigtime ‘tulak’ timbog sa P3.4-M shabu

MANILA, Philippines — Sa kulungan ang bagsak ng isang sinasabing bigtime na ‘tulak’ ng droga matapos masakote ng mga otoridad at makumpiskahan ng nasa P3.4-milyong halaga ng shabu sa isinagawang buy-bust operation sa isang subdivision sa Brgy. Molino 3, Bacoor City, sa lalawigan ng Cavite, kamakalawa.

Ang suspek na nadakip ay kinilalang si Datukon Esmail, nasa hustong gulang, at residente ng Town and Country Subdivision, sa nasabing lugar.

Sa ulat ng pulisya, dakong alas-12:00 ng tanghali nang ikasa ang operasyon ng mga otoridad laban sa suspek.

Nakuha sa suspek ang 5 plastic bag na naglalaman ng shabu na may timbang na 500 gramo at nagkakahalaga ng P3.4-milyon.

Nabatid na ilang araw ding isinailalim sa surveilance ang suspek matapos na makatanggap ng ilang reklamo ang mga otoridad mula sa mga residente sa nasabing subdivision hinggil sa talamak na pagbebenta ng droga ng suspek.