Kandidatong konsehal, itinumba
MANILA, Philippines — Hindi na naituloy ng isang kadidatong konsehal para sa nalalapit na Midterm Elections sa 2019 ang kanyang pag-eehersisyo matapos ratratin ng ‘di pa natutukoy na mga salarin habang nagdya-jogging kahapon ng umaga sa Poblacion, Bayambang, Pangasinan.
Kinilala ang nasawing biktima na si Levin Uy, nasa hustong gulang, dating konsehal ng bayan ng Bayambang na nagpahinga lamang sa pulitika at muling kumakandidato sa nasabing puwesto.
Ang kasamahan nitong si Cesar Salosagcol ay nagtamo naman ng sugat sa katawan bunga ng insidente.
Sa ulat ng Pangasinan Police, nangyari ang insidente sa bisinidad ng Brgy.Zone 2 ng bayang ito dakong alas-7:00 ng umaga.
Base sa imbestigasyon kasalukuyang nagdya-jogging ang biktima kasama si Salosagcol nang pagbabarilin ng dalawang armadong suspek.
Naisugod pa sa pagamutan si Uy ngunit idineklarang dead-on-arrival habang patuloy namang nilalapatan ng lunas ang nasugatang si Salosagcol.
Patuloy naman ang masusing imbestigasyon ng mga awtoridad sa kasong ito at inaalam na rin kung may kinalaman ito sa pulitika.
- Latest