Bahay sinuwag ng ambulansya, 6 sugatan

MANILA, Philippines — Anim katao ang isinugod sa pagamutan kasama ang dalawang sanggol matapos salpukin nang rumaragasang ambulansya ang isang bahay sa tabi ng Rolando Andaya Highway sa Brgy. Amomokpok sa bayan ng Ragay, Camarines Sur kamakalawa ng hapon.

Sugatang dinala sa Ragay District Hospital ang mga biktimang si Michaela Parafina, 20; Judylyn Belleras, 21; Micaela Belleras,13; at ang mga sanggol na sina Prince Elnathan Nunez Belleras,10-buwang gulang at Akio Brent Tating, 4-buwang gulang, pawang residente sa nasabing barangay.

Sa ulat, dakong alas-2:25 ng hapon, mabilis na binabaybay ng ambulansya (SKW-504) ng LGU-Catanduanes ang highway na minamaneho ni Donald Sorreda, 35-anyos, residente ng Brgy. Pacol, Naga City nang mawalan ng kontrol sa manibela at bumangga sa bahay na nasa tabi ng kalsada kung saan nasa loob ang mga biktima.

Agad sinaklolohan ng mga residente at isinugod sa ospital ang mga sugatang biktima kasama na ang driver ng ambulansya na si Sorreda.

Sa imbestigasyon, lumalabas na naidlip habang nagmamaneho ang drayber ng ambulansya.