Bahay ng municipal treasurer grinanada, 2 sugatan!

NORTH COTABATO, Philippines — Sugatan ang dalawa katao matapos na hagisan at pasabugan ng granada ng ‘di kilalang suspek ang harap ng bahay ng isang municipal treasurer na isinabay sa brown out sa Quezon St., Notre Dame Drive, Poblacion, bayan ng Pikit.

Kinilala ang mga sugatan na sina Kim John Cañada, nasa hustong gulang at Toto Montecino, 39. Sa ulat, sumabog ang nasabing granada malapit umano sa bahay ni Municipal Treasurer Ariel Cabañog, bago mag-alas-7:00 ng gabi nitong Linggo.

Wala pang natutumbok ang mga pulis kung sino ang target ng mga suspek sa nasabing pagsabog na nangyari sa kasagsagan ng mahabang brown-out sa lugar.