2 ‘tulak’ todas sa shootout
MANILA, Philippines — Patay sa barilan ang dalawang hinihinalang tulak ng droga matapos umanong manlaban sa mga elemento ng City Police Station 4, Police Station 1, City Drug Enforcement Unit, at PDEA-ARMM sa inilunsad na buy-bust operation kamakalawa ng hapon sa Cotabato City.
Kinilala ni City Police Station 4 commander, Chief Inspector Tirso Pascual ang mga napaslang na sina Abdulrauff Dimacisil alias Raffy, 41, ng Barangay Poblacion Dos at Salahudin Embil Mantawil, 35, ng Lugay-Lugay, Barangay Bagua Uno ng lungsod.
Ayon kay Pascual, pasado alas-3 ng hapon nitong Sabado nang ikasa nila ang buy-bust operation laban kay Dimacisil na nagresulta sa pagkamatay nito at kasamang si Mantawil.
Nakuha ng mga awtoridad sa dalawa ang mga pakete ng hinihinalaang shabu, P500 marked money, isang hand grenade at isang Yamaha motorcycle.
Ayon kay Pascual, matagal na nilang minamanmanan ang mga suspek bago ikasa ang operasyon.
- Latest