Snack bar pinasabog: 2 malubha
MANILA, Philippines — Dalawang kustomer ang malubhang nasugatan matapos hagisan ng granada ng ‘di pa kilalang suspek na naka-motorsiklo ang isang snack house sa Barangay Poblacion, Carmen, North Cotabato, gabi ng linggo.
Kinilala ni Supt. Bernard Tayong, tagapagsalita ng Cotabato Police Provincial Office ang mga sugatan na sina Mariel Referente, 17, estudyante at Jaybe Gatila, 22, self-employed; kapwa residente ng Barangay Poblacion ng nasabing bayan at ginagamot sa Carmen Municipal Hospital.
Batay sa ulat, nagmemerienda ang dalawang biktima sa Snackhuz NR snack bar alas-7:55 ng gabi sa Sayre National Highway, Purok 6, Poblacion Carmen nang ihagis ng nag-iisang suspek ang isang matigas na bagay na tumama pa sa likod ng isa sa mga biktima.
Gumulong umano ito sa ilalim ng mesa at biglang sumabog kung saan ang mga sugatan ay mabilis na isinugod sa pagamutan.
Posibleng pananabotahe ang tinitingnang motibo sa paghahagis ng granada sa nasabing bar dahil ang bayan ay naghahanda para sa kanilang kapiyestahan.
- Latest
