NPA ambush: 3 pulis utas
Target na FDA director, ligtas
MANILA, Philippines — Tatlong alagad ng batas ang nagbuwis ng kanilang buhay habang tatlo sa mga kasamahan nila ang sugatan nang tambangan ang convoy ni Food and Drugs Administration (FDA) Director General Nela Charade Puno ng nasa 20 armadong miyembro ng New People’s Army (NPA) sa highway ng Brgy. Napolidan, Lupi, Camarines Sur nitong Huwebes ng umaga.
Kinilala ang mga napatay na pulis na sina SPO1 Percival Rafael, PO3 Carlito Navarroza at PO1 Ralph Jason Vida.
Patuloy namang nilalapatan ng lunas sa pagamutan ang mga sugatang pulis na sina PO1 Jonathan Perillo, PO1 Ruby Buena at PO1 Rodolo Gonzaga, pawang miyembro ng Camarines Sur Provincial Police Office (PPO).
Masuwerte namang nakaligtas si Puno na nakasakay sa ibang behikulo sa nasabing convoy na pinaniniwalaang tunay na target ng nasabing ambush.
Ayon sa ulat ng Police Regional Office (PRO) V, dakong alas-9:10 ng umaga, habang bumabagtas sa naturang lugar ang convoy para escortan si Puno patungong Daet, Camarines Norte nang pagsapit sa isang lugar ay agad na pinaulanan ng bala ang sinasakyang PNP vehicle ng mga biktima ng mga nakaposisyon nang mga rebelde na ikinasawi ng tatlong pulis at ikinasugat ng 3 pa nilang kasamahan habang mapalad namang nakaligtas si Puno.
Nagsasagawa na ngayon ng hot pursuit operations ang pinagsanib na elemento ng Philippine Army at ng pulisya laban sa grupo ng mga rebelde na responsable sa pananambang.
- Latest