2 mister dedo, 3 grabe sa road mishap

TUGUEGARAO CITY, Cagayan  , Philippines  —   Dalawang mister ang sumalubong kay kamatayan habang tatlo pa ang malubha sa magkahiwalay na aksidente sa Bangui, Ilocos Norte noong Sabado. Namatay ang obrerong si Raymark Isod, 21, matapos na tumalon mula sa sinasakyang truck na nawalan ng preno saka sumalpok sa isang poste sa palikong bahagi ng kalsada sa Barangay Baruyen. Sa ulat, sugatang isinugod sa Bangui District Hospital ang drayber ng truck na si Joseph Ongcol, 46, at isa pang obrero na si Roel Martin matapos ang sakuna.

Samantala, sa Brgy. Lanao, nasawi si Roy Carnate, 52, habang sugatan si Raffy Jacinto, 22,  matapos na magsalpukan ang kani-kanilang sinasakyang motorsiklo. Kapwa isinugod sa Mariano Marcos Memorial Hospital and Medical Center sa Batac City ang dalawa subalit nalagutan ng hininga habang ginagamot si Carnate.