Jeep bumaliktad 1 patay, 15 sugatan
MANILA, Philippines — Isang pasahero ang nasawi habang 15 ang sugatan matapos bumaliktad ang kanilang sinasakyang pampasaherong jeep sa kahabaan ng highway ng Brgy. Sagrada sa bayan ng Libon, Albay kamakalawa ng hapon.
Nalagutan ng hininga habang nilalapatan ng lunas ang biktimang si Elevita Delos Angeles Manuel, 64, residente ng Brgy. Badian sa bayan ng Oas.
Lahat naman ng 15 pasahero kasama na ang driver ng jeep na si Ricardo Ramos na nagtamo ng mga galos at sugat sa katawan ay pinauwi makaraang mabigyan ng gamot.
Sa ulat, dakong alas-2:10 ng hapon, binabaybay ng jeep (EVN-981) na minamaneho ni Ramos ang kahabaan ng highway nang biglang mawalan ng preno dahilan upang mawalan na rin ng kontrol sa manibela at tuluyang bumaliktad sa kalsada ang sasakyan.
Agad namang sinaklolohan ng mga residente ang lahat ng mga sugatan at isinugod sa ospital kung saan nasawi si Manuel.
- Latest
