Hepe ng Midsayap, Gensan sibak!
Sa magkasunod na pambobomba
MANILA, Philippines — Sinibak kahapon ni Philippine National Police (PNP) Chief P/Director General Oscar Albayalde ang hepe ng Midsayap, North Cotabato at Station 2 Commander ng General Santos City Police sa South Cotabato matapos ang magkasunod na insidente ng pambobomba na ikinasawi ng isa katao habang pito pa ang nasugatan noong Linggo.
Inianunsyo ni Albayalde sa ginanap na flag raising sa Camp Crame ang pagsibak sa dalawang hepe kaugnay sa pagsabog sa nasabing mga lugar.
Kinilala ang mga sinibak na opisyal na sina Supt. Samuel Cadungon, hepe ng Midsayap Police at General Santos City Police Station 2 Commander P/Chief Inspector Patrich Elma.
Si Cadungon ay pinalitan ni Supt. Joan Maganto habang humalili naman kay Elma si Sr. Inspector David Dulawan.
Sa update sa pagsabog sa Brgy. Apopong, General Santos City kamakalawa, isa na ang nasawi at walo pa ang nasugatan malapit sa pagsabog sa labas ng Prince Internet Café sa kahabaan ng Valdez Street sa Brgy. Kalawag 2 bandang-11:40 ng tanghali. Nasundan pa ng isang pagsabog sa Theresa’s Place Videoke Bar Brgy. Poblacion 4, Midsayap, North Cotabato kamakalawa dakong alas-7:10 ng gabi na bagama’t walang nasugatan sa insidente ay lumikha ito ng matinding alarma sa mga sibilyan.
Sinabi ni Albayalde na isa ang grupo ng Abu Turaife sa paksyon ng Bangsamoro Islamic Freedom Fighters (BIFF) at tatlong iba pang lokal na teroristang grupo ang tinitingnan na nasa likod ng magkasunod na pambobomba.
Ayon naman kay Joint Task Force Central Commander, Brig. Gen. Cirilito Sobejana, ang Daesh inspired Abu Turaife Group ang responsable sa nasabing pag-atake sa Midsayap at tinawag nito “peace spoilers” ang mga terorista na naghahasik ng karahasan sa iba’t-ibang mga lugar sa Mindanao.
- Latest
