Drug ops: 6 tiklo sa P2-M shabu
CAVITE , Philippines — Anim na katao kabilang ang dalawang empleyado ang naaresto matapos na mahulihan ng bultong shabu na nakabalot sa mga plastic na nagkakahalaga sa halos 2 milyong piso sa isinagawang buy-bust operation ng Bacoor Drug Enforcement Unit at PDEA-Cavite sa Green Valley, Mesena Compd., Brgy. Molino 3, Bacoor City kamakalawa ng hapon.
Kinilala ni P/Supt. Vicente Saspa Cabatingan, OIC ng Bacoor Police ang mga naarestong suspek na sina Luzviminda Barrameda alias Luz, 36-anyos, vendor; Olive Barrameda alias Olive, 19-anyos; Ma. Madiline Gemino alias Madel, 44-anyos, online seller, Gerardo Quinton alias Narding, 49-anyos, CENRO employee; Ariston Menez alias Allan, 42, CENRO employee, at Romeo Menez alias Dodong, 41, construction worker, pawang mga residente ng Green Valley, Mesena Compd., Brgy. Molino 3, Bacoor City, Cavite.
Sa ulat, isang pulis ang nagsilbing poseur buyer at nakipag-deal sa mga suspek na bibili ng 1.5 gramo ng shabu sa halagang P10,200.
Ang tatlong suspek na babae ang magkakasamang nakipag-deal sa buyer at nang magpositibo ay dito na sila dinakma ng mga awtoridad habang ang tatlo pang suspek ang nagsilbi umanong mga lookout sa labas at loob ng lugar.
Unang nakuha sa mga suspek ang may 226.9 gramo ng shabu na nasa P1,542,920 at isa pang maliit na plastic container na may shabu na tumitimbang ng 63.4 gramo at nasa P431,120.
- Latest