2 establisimyento ni Peter Lim hinagisan ng eksplosibo
MANILA, Philippines — Dalawang establisimyento ng negosyante at pinararatangang drug lord na si Peter Lim ang hinagisan ng pampasabog ng hindi pa nakilalang mga kalalakihan sa lungsod ng Cebu kamakalawa.
Si Lim ay isa nang pugante ng batas matapos na magtago pagkaraang maglabas ng warrant of arrest ang Makati Regional Trial Court (RTC) sa kasong umano’y pakikipagsabwatan nito sa illegal drug trade.
Sa ulat, dakong alas-2 ng madaling araw nang hagisan ng eskplosibo ang Chuva-Chuva Massage and Spa, at KTV bar ni Lim na matatagpuan sa Tres Borces Streest, Brgy. Mabolo ng lungsod.
Ayon sa guwardya, isang motorsiklo lulan ng dalawang hindi nakilalang lalaki ang nakitang umaaligid sa lugar. Ilang saglit pa, bigla na lamang naghagis ng eksplosibo ang mga suspek na lumikha ng malakas na pagsabog at puminsala sa massage parlor at saka mabilis na nagsitakas ang dalawang lalaki.
Matapos ang isang oras, sumunod na hinagisan ng eksplosibo ang KTV bar na matatagpuan sa Archbishop Reyes Avenue sa Brgy. Kamputhaw pero nabigo itong sumabog. Ang sangkap ng pampasabog ay 1.5 litrong soda na nakalagay sa bote na may pulbos na puti.
- Latest
