Trader, helper todas sa pamamaril

MANILA, Philippines — Nasawi ang isang trader at ang helper nito makaraang pagbabarilin ng hindi pa nakikilalang armadong salarin sa pamilihang bayan ng Brgy. Poblacion, Cordova, Cebu nitong Biyernes ng gabi.

Kinilala ang mga nasawing biktima na sina Arlyn Menguito, 37 taong gulang, residente sa lugar at helper nitong si Gilbert Tajanlangit.

Ang dalawang biktima ay nagtamo ng mga tama ng bala sa iba’t-ibang bahagi ng katawan na siyang dagliang kumitil sa kanilang buhay.

Sa report ng pulisya, pasado alas-7:00 ng gabi habang isinasara na ng negosyante ang kanilang puwesto sa pamilihang bayan nang biglang sumulpot ang isang armadong lalaki habang nagsilbi namang lookout ang kasamahan nito.

Bigla na lamang pinagbabaril ng suspek ang target na negosyante kung saan ipinalalagay na nadamay lamang ang helper nito.

Matapos makasigurong napuruhan ang target ay mabilis na tumakas ang salarin patungo sa hindi pa malamang destinasyon.