Karnaper tumba sa parak
SILANG, Cavite, Philippines — Bumulagta ang isang sinasabing kilabot na karnaper makaraang masabat ng mga otoridad habang siya’y papatakas tangay ang kinarnap na motorsiklo kahapon ng madaling araw sa Brgy. Pooc, Silang, Cavite.
Nakilala lamang ang suspek sa alyas na ‘Jojo’, nasa hustong gulang. Sa ulat ng pulisya, alas-2:30 ng madaling araw, kasalukuyan silang nagpapatrulya sa nasabing lugar nang masabat nila ang suspek na sakay ng isang itim na motor na walang plaka.
Lalapitan sana umano ng mga pulis ang suspek ngunit sinalubong sila nang sunud-sunod na putok na mabuti naman ay walang natamaan sa mga pulis. Dito na nagkaroon ng habulan at engkuwentro hanggang sa bumulagta ang suspek.
Narekober dito ang dalawang fired cartridges ng 9 mm, isang kalibre .38 baril, at ang itim na motor na hinihinalang kinarnap nito sa ‘di pa malamang biktima.
- Latest