Tserman at misis, 4 pa timbog sa drug ops
MANILA, Philippines — Isang barangay chairman at kanyang misis at apat pang iba na sinasabing mga kilabot na tulak ng droga ang naaresto sa magkahiwalay na drug operation sa Dasmariñas City, Cavite, kamakalawa.
Kinilala ang mga dinakip na sina Barangay Salitran 1 Chairman Mario Valerio, 56-anyos at misis niyang si Reynalin Valerio, 39, matapos na masamsaman ng walong plastic sachet ng shabu na nasa pitong gramo at nagkakahalaga ng P47,000 makaraang salakayin ang kanilang bahay sa bisa ng search warrant na inisyu ng korte dakong alas-9:00 ng gabi.
Samantala, dakong alas-5:30 ng hapon, sa Brgy. Datu Esma, timbog ang isang buong pamilya kabilang ang dalawang menor-de-edad sa ikinasang buy-bust operation ng mga pulis-Cavite.
Isang malaking plastic bag na naglalaman ng shabu ang nakuha mula sa mga suspek na sina Paks Bongcarao, 63-anyos, mga anak niyang sina Anisah, 19, itinago sa mga pangalang ‘Dagul’, 15 at ‘Gagil’ ,17-anyos pawang mga residente ng naturang barangay.
Nahaharap ngayon ang mga suspek sa kasong paglabag sa RA 9165 o Comprehensive Dangerous Drug Act of 2002.
- Latest