P73.4-M shabu nasamsam ng drug ops
MANILA, Philippines — Umaabot sa P73.4 milyong halaga ng shabu ang nasamsam ng pinagsanib na elemento ng pulisya, militar at Philippine Drug Enforcement Agency (PDEA) sa dalawang magkakahiwalay na operasyon sa lungsod ng San Carlos at Bacolod, Negros Occidental nitong Martes ng hapon at Miyerkules ng madaling araw.
Ayon kay Chief Supt. John Bulalacao, dakong alas–12:30 ng madaling araw nitong Miyerkules nang magsagawa ng anti-drug operation ang mga operatiba sa isang plantasyon ng tubo sa Brgy. Talampas, San Carlos City ng lalawigan. Umaabot sa mahigit anim na malalaking plastic na naglalaman ng shabu ang nakumpiska sa lugar na nagkakahalaga ng P72 milyon. Nakatakas naman ang mga suspek matapos na matunugan ang pagdating ng mga operatiba sa plantasyon. Tinukoy nito ang mga target na bigtime drug traffickers na sina alyas Putot, Armando Paraquelles at Josephine Paraquelles alyas Tipin.
Nabatid na isang PDEA agent ang nakipagtransaksyon sa mga drug traffickers pero nagpulasan umano ng takbo nang mamataan ang presensya ng mga pulis at militar sa lugar.
Sa isa pang operasyon, nasakote ang umano’y dalawang big time drug pushers na sina Faisalin Ubra at Norhan Caunda sa buy bust operation sa Purok Ube, Brgy. 4, Bacolod City bandang alas-4:30 ng hapon nitong Martes. Sila ay nakumpiskahan ng ilang malalaking plastic sachet ng shabu na nasa sa P1.4 milyon ang halaga at mga drug paraphernalias.
- Latest
