Motor salpok sa bus: Backrider dedo, 3 malubha
LEGAZPI CITY, Albay , Philippines — Nalasog ang katawan ng isang 25-anyos na backrider ng motorsiklo habang kritikal sa ospital ang tatlong kasamahan nito makaraang mabangga at makaladkad sila ng bus sa kahabaan ng highway ng Brgy. Burabod, Sorsogon City, Sorsogon kamakalawa ng gabi.
Tinangka pang isugod sa Sorsogon Provincial Hospital pero Idineklarang patay ang biktimang si Bryan Estadula Digol, ng Brgy. Bibincahan habang sugatan ang driver ng motorsiklo na si Patrick James Avisado, 23, at ang kasamahang mga backriders na sina Bryan Dayto Detera, 24, at Kevin Deniega, 22, na pawang nagtamo ng sugat sa ulo at iba’t ibang bahagi ng katawan.
Sa ulat, dakong alas-11 ng gabi, magkasunod na binabagtas ng motorsiklong minamaneho ni Avisado at ng Elavil Bus (TYS-796) na minamaneho ni Aldin Navera, 37, ng Brgy. Libod, Camalig, Albay ang highway nang mabundol ng bus ang hulihang bahagi ng motorsiklo ng mga biktima. Bunga nito, nakaladkad pa ng bus ang mga biktima ng ilang metro sanhi ng agarang pagkasawi ni Digol.
Agad namang sumuko ang driver ng bus na sinampahan ng patong-patong na kaso.
- Latest