‘Tulak’ kumasa sa checkpoint, todas
CAVITE, Philippines — Patay ang isang lalaki matapos na umano’y umalma sa inilatag na checkpoint ng pulisya at makipagbarilan kahapon ng madaling-araw sa Gen. Mariano Alvarez, ng lalawigan.
Kinilala lamang ng pulisya ang napatay sa alyas “Nano”, nasa hustong gulang at residente ng nasabing bayan.
Nabatid na ang suspek ay kasama sa drug watchlist ng Silang at GMA Police at kilala rin umanong holdaper.
Sa imbestigasyon, dakong alas-2:00 ng madaling araw habang nagsasagawa ng Oplan Sita ang pulisya sa Congressional Road, Brgy. Poblacion 1 ng bayang ito nang isang lalaki na sakay ng motorsiklo na walang plaka ang kanilang namataan.
Patungo umano ng north direction ang lalaki at nang kanilang haharangin ay biglang umarangkada at nilampasan ang checkpoint. Dahil dito, nagkaroon ng habulan hanggang sa makorner ang suspek sa nasabing lugar at nagkaputukan.
Tumimbuwang ang suspek at narekober dito ang isang maiksing baril at ang motor na ginamit nito.
- Latest