4 ‘tulak’ minasaker ng tandem
MANILA, Philippines — Apat na katao kabilang ang isang babae na sinasabing mga “tulak ng droga” ang minasaker matapos na pagbabarilin habang masayang nag-iinuman ng hindi pa nakikilalang riding-in-tandem sa Barangay Mambugan, Antipolo City kamakalawa ng gabi.
Ang mga biktima ay nakilalang sina Rommel Auxtero Bedrona, 30; Leonard Constantino alyas “Sarge”, 27; Dave Natalaray, 32 at Margaret Diane Salazar, 21, na live-in partner ni Constantino.
Sinasabing ang apat ay pawang drug surrenderees na may kategorya bilang drug pushers at users na hindi umano tumigil sa kanilang gawain.
Sa ulat ng Antipolo City Police kay PRO4 Regional Director P/Chief Supt. Edward Carranza, dakong alas-11:30 ng gabi habang masayang nag-iinuman ang mga biktima sa harapan ng barber shop sa 1st Street sa Virginia Summerville Subdivision, sa Brgy. Mambugan nang bigla na lang dumating ang dalawang suspek na magkaangkas sa motorsiklo at kaagad na pinaulanan ng bala ang mga biktima.
Kaagad namang rumesponde ang mga pulis sa crime scene ngunit nakatakas na ang mga suspek, habang dead-on-the-spot na sina Natalaray at Salazar. Naisugod pa sa pagamutan ngunit hindi na rin umabot pa nang buhay sina Bedrona at Constantino.
- Latest