Cavite encounter: 2 ‘tulak’ utas!

CAVITE, Philippines — Dalawa ang kumpirmadong patay matapos ang engkuwentro sa pagitan ng dalawang umano’y drug pusher at mga kagawad ng pulisya sa isinagawang buy bust operation sa Bacoor City, sa lalawigang ito kahapon.

Nakilala lamang sa mga alias na Lorick at Romiel ang mga napatay na suspek.

Sa ulat ng pulisya, dakong alas-2:55 ng madaling araw nang magpanggap na poseur buyer ang isang operatiba ng Bacoor Police sa Bacoor Boulevard, Brgy. Niog, nasabing lungsod.

Habang isinasagawa ang transaksyon, nakatunog umano ang mga suspek na pulis ang kanilang ka-deal kung kaya mabilis silang tumakbo at sumakay ng kanilang dalang motorsiklo na kulay itim na Sym na walang plaka patungo sa direksyong katimugan ng Molino Road. Dito na nagkaroon ng habulan at palitan ng putok hanggang sa tumimbuwang ang dalawang suspek.

Narekober sa mga suspek ang dalawang maiksing baril, hinihinalang mga shabu at drug paraphernalia.