2 ‘tulak’ todas sa buy bust
CAVITE, Philippines — Dalawa na namang tulak ang patay matapos makipagbarilan sa mga awtoridad sa isinagawang magkahiwalay na buy bust operation sa Gen. Mariano at Silang ng lalawigan, iniulat kahapon. Kinilala lamang ang suspek sa alyas Dino, may taas na 5’7 at nasa 20 pataas ang edad na nasawi sa Gen. Mariano habang ang suspek na napatay sa Silang ay si Eduardo Villarmino alias “Blackpair”, nasa hustong gulang, ng Brgy. Sabutan ng nasabing bayan.
Sa unang report, alas-2:00 ng madaling araw nang ikasa ng Gen. Mariano Police sa pangunguna ni P/Chief Inspector Romulo Co Dela Rea at PDEA-4A ang buy bust operation laban kay Dino. Habang nakikipagtransaksyon sa suspek ang isang posuer buyer, nakatunog umano ang una na mga pulis ang ka-deal kung kaya mabilis na nagpaputok at tumakbo subalit gumanti ng putok ang mga awtoridad sanhi ng kanyang kamatayan.
Dakong ala-1:18 naman ng madaling araw nang makipagbarilan sa mga pulis si Villarmino sa inilatag na buy bust operation ng Silang Police sa pangunguna ni Supt. Rommel Laconsay Javier sa Brgy. Sabutan kasama ang PDEA-4A laban sa suspek.
Narekober kay Dino ang isang cal. 38 revolver; dalawang naiputok at 4 na cartridge; P795 cash; 14 piraso ng plastic sachet ng shabu, isang cellphone at isang MC Honda na walang plaka at dokumento habang kay Villarmino ay isang cal. 38 revolver at shabu na nasa plastic sachet.
- Latest