16-anyos tinangkang halayin ng pulis
MANILA, Philippines – Nasa balag ng alanganing masibak sa tungkulin at makasuhan ang bagitong pulis matapos itong ireklamo ng 16-anyos na dalagita nang tangkang panghahalay sa dinaluhan nitong birthday party sa Barangay Wawa, bayan ng Nasugbu, Batangas, ayon sa ulat kahapon.
Dumulog sa himpilan ng Nasugbu PNP ang biktimang itinago sa pangalang Elena upang ireklamo ang suspek na si PO1 Lorie Boy Saraza, ng Calatagan PNP.
Sa salaysay ng biktima, naganap ang insidente noong Linggo ng gabi (Mayo 29) kung saan hindi kaagad naipagbigay-alam sa pulisya dahil sa matinding takot sa suspek.
Napansin naman ng ina ng dalagita ang pagiging tulala nito at kalimitang umiiyak kaya inusisa ito hanggang sa ipagtapat ang naganap na insidente.
Nabatid na dumalo sa birthday party ng kaibigang si Elena kung saan sa kasagsagan ng pagdiriwang ay kinausap ng suspek ang biktima na kakausapin sabay hinila sa silid.
Sinabi ng dalagita na itinulak siya sa kama ng suspek na sinabing papatayin kapag pumalag kasabay pinaghihipuan, pinaghahalikan at inuumpisahan ng gahasain nang may kumatok ng malakas sa pintuan.
Dahil sa sunud-sunod na katok ay napilitan ang suspek na tumayo at buksan ang pintuan kung saan dito na nakakita nang pagkakataon ang dalagita para tumakas.
Samantala, nang mabatid ng suspek na nagreklao na sa pulisya ang dalagita ay tumakas ito at hindi matagpuan sa himpilan ng pulisya na kaniyang pinagsisilbihan.
- Latest
