Cavite Police vs Estupin drug gang: 1 patay!

CAVITE, Philippines – Bulagta ang isang miyembro ng bigtime drug syndicate habang naaresto ang isa pa matapos makipagbarilan sa mga humahabol na operatiba ng Intelligence Section at Special Operations Group ng Bacoor City Police kamakalawa ng gabi sa lungsod.

Kinilala lamang ng pulisya ang napatay na suspek sa alias “Nonoy” habang arestado ang asawa ng kanilang lider na si Princess Pearl Estupin, 30-anyos, ng Blk 23 lot 13 Rosewood  Village, Brgy Niog 2. Bacoor.

Tinutugis pa ng pulisya ang lider ng Estupin drug syndicate na si Joveth Estupin, alias EJ, 28, ng  nasabi ring lugar. Ang mag-asawang suspek ay may mga patung- patong ng kasong paglabag sa RA 9165. Sila ay kasama sa target list ng “Oplan Lambat Sibat” ng pulisya.

Sa ulat ni PO3 Michael Legaspi,  nagsagawa ng buy bust operation ang pulisya laban kay Princess Pearl Estupin, sa ilalim ng Philippine Drug Enforcement Agency (PDEA).

Habang inaaresto ang mga suspek, naglabas ng maiksing baril si Noynoy at pinaputukan ang mga pulis. Nagkaroon ng gun battle hanggang sa mapuruhan sa barilan si Noynoy habang nakatakas ang nasabing lider.