Bill na lulusaw sa ‘no permit, no exam’ policy pasado na sa Kamara
MANILA, Philippines — Pasado na sa Mababang Kapulungan ng Kongreso ang panukalang batas na lulusaw sa “no permit, no exam” policy sa mga pribadong eskwelahan sa bansa nang pinagtibay sa ikatlo at huling pagbasa.
Sa botong 259 mambabatas na pumabor ay ganap na napagtibay sa plenaryo ng Kamara ang House Bill (HB) No. 7584.
Alinsunod sa panukala, papatawan ng parusa ang mga pribadong eskuwelahan sa elementarya at maging sa high school na nagbabawal sa mga estudyante na kumuha ng periodic examination kung hindi pa ang mga ito bayad sa kanilang mga tuition fees.
Umaasa naman si House Speaker Ferdinand Martin Romualdez na sa pamamagitan ng naipasa nilang panukalang batas ay mabibigyan na ng pagkakataon ang mga mag-aaral na may makatwirang dahilan na makasama sa pagsusulit.
Nakasaad sa Section 4 ng panukala na kailangan lamang na magsumite ang mga magulang o guardians ng mga estudyante mula sa mga pribadong paaralan ng promisory note bago ang itinakdang araw ng eksaminasyon.
- Latest
