Total deployment ban ng OFWs sa Kuwait, giniit
MANILA, Philippines — Matapos ang pagkamatay ng Pinay na si Jullebee Ranara, iginiit ni Sen. Raffy Tulfo na magpatupad ang gobyerno ng “total deployment ban” ng mga overseas Filipino workers (OFWs) sa Kuwait.
Diin ni Tulfo, chairman ng Senate Committee on Migrant Workers na dapat unahin ang pagpapatupad ng deployment ban bago magsagawa ng bilateral talks.
“After the deployment ban, we can sit down with them sa bilateral talks. Pero on our terms. Meron tayong mga conditions na ibibigay sa kanila kung gusto ng ating OFWs,” ani Tulfo nitong Biyernes ng gabi.
“You want to talk to us, total deployment ban. ‘Pag may pinanghawakan tayo, ‘pag na-issue, then let’s talk on our terms,” dagdag ni Tulfo.
Aminado si Tulfo na maaapektuhan ang mga OFWs na pabalik sa Kuwait sa sandaling matuloy ang total deployment ban pero hindi dapat mabalewala ang kaligtasan ng mga Filipinos sa nasabing bansa.
Hindi aniya dapat maging malambot ang gobyerno sa nasabing isyu lalo pa’t kailangan ng Kuwait ang mga OFWs.
Sinabi rin senador na dapat mag-demand ng public apology ang Pilipinas sa gobyerno ng Kuwait. Hindi aniya sapat ang paghingi ng tawad sa pamilya ng biktima. Inirekomenda rin niya ang mas mahigpit na proseso ng screening para sa mga employers.
Samantala, sinabi ng Department of Migrant Workers (DMW) kahapon na kanilang rerepasuhin ang umiiral na “bilateral labor agreement” (BLA) sa pagitan ng Pilipinas at Kuwait upang higit na maprotektahan ang mga OFWs.
“The directive of Secretary Toots (Susan) Ople (is) that it is time to revisit or review the labor agreement to further strengthen the protection of OFWs,” ani DMW Undersecretary Hans Leo Cacdac sa Saturday News Forum.
Ang BLA ay nilagdaan sa pagitan ng Pilipinas at Kuwaiti governments noong 2018. Inirekomenda naman ni Quezon City 2nd District Rep. Ralph Tulfo sa pamahalaan na isagawa sa bansa ang bagong labor agreement sa Kuwait hinggil sa deployment ng mga OFWs doon. - Ludy Bermudo, Joy Cantos
- Latest
