Pulis, nadulas todas sa sariling baril

MANILA, Philippines — Hindi na umabot ng buhay sa ospital ang isang pulis matapos na aksidenteng mabaril ang sarili sa Santiago City, Isabela.

Ang nasawi ay kinilalang si P/Master Sgt. Henry Areola Esteban, 46, may-asawa, residente ng San Andres­, Santiago City at nakatalaga sa Traffic Enforcement Unit ng  SCPO.

Ayon sa Station 1 ng Santiago City Police Office, alas-10:00 ng umaga ay nagtungo sa kanilang bakuran malapit sa tabing ilog ang biktima dala ang baril para mag-firing.

Sa hindi inaasahang pangyayari ay nadulas ito at nakakabit ang gatilyo ng baril  at tumama ang bala sa kanyang ulo.

Isinugod ang biktima sa ospital, subalit namatay sa daan pa lamang. Nakuha sa crime scene ang isang Cal. 9mm pistol Glock 17 at basyo ng bala nito.