DepEd gagastos ng P112 milyon sa sinirang iskul ni ‘Karding’
MANILA, Philippines — Gagastos ng P112 milyon ang Department of Education (DepEd) upang makumpuni ang mga nasirang eskuwelahan dahil sa Bagyong ‘Karding.’
Base sa inisyal na assessment ng Disaster Risk Reduction and Management Service (DRRMS) ng DepEd, tinatayang 20 eskuwelahan ang nasira ng nagdaang bagyo na matatagpuan sa Ilocos Region, Cagayan Valley, Central Luzon, Bicol Region, National Capital Region (NCR) at Cordillera Administrative Region (CAR).
Sa huling ulat noong Lunes, 327 eskuwelahan sa nasabing anim na rehiyon ang patuloy na ginagamit na evacuation center.
Dagdag pa ng DepEd, mayroon ding 107 school divisions na naapektuhan sa Ilocos Region, Cagayan Valley, Central Luzon, Calabarzon, Mimaropa, Bicol Region, NCR at CAR.
Samantala, nasa 12,174,549 mag-aaral din mula sa 21,509 paaralan ang naapektuhan ng bagyo, kabilang na ng suspensiyon ng klase.
- Latest
