MMDA: Traffic violators na nahuli puwede nang umapela online

MANILA, Philippines — Naglunsad ang Metropolitan Manila Development Authority (MMDA) ng isang online filing platform para makapaghain ng “traffic citation contest” o apela ang mga motorista na hinuli dahil sa paglabag sa mga batas trapiko.

Ayon sa MMDA, ka­ilangan lamang na mag-fill out ng online complaint form ang mga naisyuhan ng traffic citation ticket sa pamamagitan ng Google form at mag-upload ng mga kinakaila­ngang dokumento gaya ng Unified Ordinance Violation Receipt (UOVR), driver’s license, at Official Receipt/Certificate of Registration (OR/CR) ng sasakyan.

Sa loob ng 3-working days, ang MMDA-Traffic Adjudication Division (TAD), na siyang namamahala sa pagdinig ng mga rekla­mong inihain ay makikipag-ugnayan sa kliyente para sa pre-processing ng contest o ang laban na pahayag mula sa naka­saad na paglabag nito sa traffic citation ticket. Ang pre-processing ay ang paunang yugto kung saan ina-assess ng TAD ang batayan at/o merito ng reklamo, pati na rin ang pagiging angkop ng mga attachment.

Ang pagdinig ay isasa­gawa ng face-to-face upang mapatunayan ang mga isinumiteng dokumento. Ang paglabas ng resolusyon ay maaaring gawin sa pisikal o sa pamamagitan ng email, sa kahilingan din ng nagre­reklamo.

Maaaring maghain ng mga protesta mula alas-8:00 ng umaga hanggang alas-5:00 ng hapon tuwing Lunes hanggang Biyernes. Ang mga na-file na lampas sa alas-5 ng hapon ay maaasikaso sa susunod na araw. Maaaring ma-access ang online form sa pamamagitan ng link na ito: https://bit.ly/3J62YhH.