‘Karding’ napanatili ang lakas, magla-landfall sa Northern Luzon
MANILA, Philippines — Iniulat kahapon ng Philippine Atmospheric, Geophysical and Astronomical Services Administration (PAGASA) na napanatili ng bagyong Karding ang kanyang lakas habang kumikilos ito sa Philippine Sea.
Si Karding ay huling namataan kahapon sa layong 1,085 kilometro ng silangan ng Northern Luzon at patuloy ang pagkilos pakanluran sa bilis na 25 kilometro bawat oras.
Taglay ni Karding ang lakas ng hangin na umaabot sa 65 kilometro bawat oras malapit sa gitna at may pagbugso ng hangin na umaabot sa 80 kilometro bawat oras.
Ngayong Sabado ng gabi hanggang kinabusakan ng umaga ay makakaranas ng mahina hanggang sa katamtaman na minsa’y malakas na ulan sa buong Batanes, Cagayan at Isabela.
Ang nalalabing araw ng linggo hanggang sa Lunes ng umaga ay makakaranas ng katamtaman hanggang sa malakas na pag-ulan sa buong Cordillera Administrative Region, Cagayan, Isabela, Ilocos Provinces at La Union. Mahina hanggang sa katamtaman na minsay malakas ang pag-ulan sa northern portion ng Aurora at nalalabing bahagi ng Ilocos Region at Cagayan Valley.
Dahil maaapektuhan ni Karding ang habagat, paminsan-minsang pag-ulan ang mararanasan simula sa Linggo sa Southern Luzon at Visayas lalo na sa kanlurang bahagi nito.
Magiging katataman hanggang sa maalong karagatan ang mararanasan sa northern at western seaboards ng Northern Luzon ngayong Sabado at patuloy na magiging maalon ang karagatan sa Northern Luzon hanggang bukas, Linggo.
Inaasahang magla-landfall si Karding sa east coast ng Northern Luzon ngayong linggo.
Inaasahang si Karding ay aabot sa tropical storm category oras na ito ay lumapit sa West Philippine Sea.
Ngayong Sabado si Karding ay inaasahang nasa layong 685 kilometro ng silangan ng Tuguegarao City, Cagayan.
- Latest