2 arrest warrant inilabas, Vhong Navarro sumuko
MANILA, Philippines — Nagpalabas ng dalawang warrant of arrest ang Taguig court laban sa TV host/actor comedian na si Ferdinand “Vhong” Navarro para sa kasong acts of lasciviousness na may piyansang P36,000.00 at isa sa kasong rape na walang kaukulang piyansa.
Si Navarro ay nasa kustodiya na ng NBI matapos kusang sumuko sa warrant of arrest na inilabas ng Taguig City Metropolitan Trial Court Branch 116 sa kasong acts of lasciviousness na inihain ng modelong si Deniece Cornejo.
Isinailalim ito sa proseso tulad ng finger printing, mugshot at pagkuha ng kanyang personal na detalye.
Subalit, kinahapunan ay isa pang warrant of arrest ang inilabas ng Taguig Metropolitan Trial Court Branch 69 sa kasong rape na walang itinakdang piyansa.
Matatandaang noong Agosto 31, 2022 pormal nang isinulong sa korte ng Taguig City Prosecutor’s Office ang kasong rape.
Nai-raffle ang dalawang kaso noong Setyembre 8, 2022 at bumagsak sa Branch 116 ang Acts of lasciviousness habang ang rape ay sa Branch 69 ng Taguig courts.
Ang paghahain ng dalawang kaso ay bunga ng inilabas na kautusan ng Court of Appeals (CA) noong Hulyo 21, 2022 na pumabor sa naging apela ni Cornejo at binawi ang mga resolusyon ng Department of Justice (DOJ) na nagbasura sa reklamong rape laban kay Navarro. - Danilo Garcia
- Latest