Akusado sa pagpatay, arestado pagkalipas ng 13 taon na pagtatago
MANILA, Philippines — Pagkalipas ng 13 taon na pagtatago sa batas ay naaresto kahapon ang isang 37-anyos na lalaki na pumatay sa kanyang kaibigan sa Muntinlupa City.
Ayon sa report ng Southern Police District na ang suspek na si Ricky Candelaria, ay una nang nadakip noong taong 2003 kaugnay sa kasong homicide, subalit nagtago matapos pansamantalang makalaya sa bisa ng piyansa.
Taong 2009 nang ma-convict si Candelaria sa kabila ng hindi niya pagdalo sa mga pagdinig sa korte.
Ang kasong homicide ay nag-ugat sa madugong engkuwentro sa pagitan ni Candelaria at kaibigan na naganap sa nasabing lungsod.
Habang nagluluto umano si Candelaria sa labas ng kaniyang bahay nang atakehin siya ng kaibigan.
“Hindi sinasadya po ‘yung pangyayari. Bigla niya po akong sinaktan. Sinipa po ako, tapos pinalo ako ng syanseng mainit. Kinuha ko po ‘yung kutsilyong pangluto, tinamaan po siya sa paa. Kaya po siya may sugat sa kamay, inaagaw kasi niya ‘yun,” ani Candelaria.
Naisugod pa sa pagamutan ang biktima, subalit namatay din dahil sa rami ng nawalang dugo sa katawan at tuluyang atakehin sa puso.
Nakatakda nang ilipat sa NBP si Candelaria upang bunuin ang sentensiya.
- Latest