Petisyon sa dagdag-pasahe aprub sa LTFRB
MANILA, Philippines — Magandang balita sa lahat ng drivers ng pampublikong sasakyan dahil inaprubahan na ng Land Transportation Franchising and Regulatory Board (LTFRB) ang kanilang petisyon sa taas-pasahe.
Sa pinalabas na desisyon ng LTFRB board, P1 provisional increase ang inaprubahan para sa Traditional Public Utility Jeepneys (TPUJs) at Modern Public Utility Jeepneys (MPUJs) para sa unang apat na kilometro.
Kaya’t ang minimum na pasahe sa TPUJ ay P12, habang ang MPUJ ay P14.May dagdag na P0.30 sa kada succeeding kilometer para sa TPUJ habang dagdag na P0.40 para sa succeeding kilometer sa MPUJ.
Sa pampasaherong bus ay naaprubahan ng board ang P2 uniformed base fare increase para sa city at provincial buses para sa unang 5 kilometro at ang succeeding kilometer fare increase na P0.35 ay naging P0.50 depende sa uri ng bus.
Inaprubahan din ang flagdown rate ng taxis at TNVS ng P5.00, kaya’t ang magiging minimum fare sa Taxis at Sedan-type TNVS ay P45, habang ang AUV/SUV-type TNVS ay P55.
Para sa mga hatchback-type TNVS ang flagdown rate ay P35 at wala namang taas-pasahe sa succeeding kilometers.
Patuloy pa ring ipaiiral ang pagkakaloob ng 20% discount para sa mga senior citizens, persons with Disability at estudyante.
Ayon sa LTFRB, kinailangang aprubahan ang mga petisyon ng mga pampasaherong sasakyan para sa fare increase dulot na rin ng pagtaas ng presyo ng produktong petrolyo. Iiral ang pagsingil ng dagdag-pasahe sa Oktubre 1.
- Latest