Isa pang pumirma sa ‘sugar import order’, nagbitiw
MANILA, Philippines — Isa pa na pumirma sa pag-angkat ng 300,000 metric tons ng asukal ang nagbitiw sa puwesto kasunod nang pagbibitiw kamakailan sa puwesto ni Agriculture Undersecretary Leocadio Sebastian.
Si Sebastian ang nagsisilbing chief of staff ng Pangulo na siya ring nangangasiwa sa Department of Agriculture.
Nagbitiw sa puwesto bilang Board member ng Sugar Regulatory Administration (SRA) si Atty. Roland Beltran sa gitna ng isyu sa umano’y iligal na paglalabas ng order para sa importasyon ng nasa 300,000 metric tons ng asukal at isa siya sa mga nakapirma sa binawing “sugar import order”.
Sa kopya ng resignation letter na isinumite kay Executive Secretary Vic Rodriguez ay sinabi ni Roland na magbibitiw siya sa puwesto dahil sa “health reasons.”
Pero paglilinaw nito, walang kinalaman ang kanyang resignation sa imbestigasyon sa SRA Board.
Noong nakaraang linggo, naglabas ang SRA ng Sugar Order 4 na nag-aapruba sa pag-aangkat ng nasa 300,000 metric tons ng asukal sa gitna ng mahal na presyo ng asukal sa merkado. Pero sinabi ng Malakanyang na iligal ang nasabing kautusan dahil hindi ito aprubado ni Pangulong Ferdinand Marcos Jr.
- Latest