US Sec. of State Blinken nag-courtesy call kay BBM
MANILA, Philippines — Dumating na sa bansa kahapon si US Secretary of State Antony Blinken at agad na nag-courtesy call at nakipagpulong kay Pangulong Ferdinand Marcos Jr. sa Malacañang.
Kabilang sa mga dumalo sa pulong sina US Ambassador to the Philippines MaryKay Carlson at Executive Secretary Vic Rodriguez. Pinag-usapan nila ang mga paraan para patatagin pa ang ugnayan ng Amerika at Pilipinas.
Muling pinagtibay nina Marcos Jr. at Blinken ang pangako ng dalawang bansa sa pamamagitan ng Mutual Defense Treaty (MDT) na unang nilagdaan noong Agosto 1951 na nagsasaad ng pagsuporta ng magkabilang panig. Sinabi ni Marcos na patuloy ang ebolusyon ng MDT at may espesyal na relasyon sa pagitan ng Pilipinas at Amerika. Malawak na aniya ang saklaw ng tulong na ipinaabot ng US sa Pilipinas.
Tiniyak naman ni Blinken kay Marcos na ang Amerika ay nananatiling nakatuon sa relasyon nito sa Pilipinas sa maraming larangan lalo na sa mga isyu tungkol sa ekonomiya at depensa.
- Latest
