July inflation rate, tumaas sa 6.4 porsyento
MANILA, Philippines — Inihayag ng Philippine Statistics Authority (PSA) na tumaas sa 6.4 porsyento ang inflation sa Pilipinas noong buwan ng Hulyo.
Ayon sa PSA, ang pagtaas ng inflation rate ay dulot ng tumaas na presyo ng mga bilihin at serbisyo noong nagdaang buwan na sinasabing ikalimang sunod na buwan noong Hulyo.
Ayon kay PSA chief at National Statistician Claire Dennis Mapa, ang 6.4 percent na inflation rate noong July 2022 ay mas mataas sa 6.1 percent noong nagdaang buwan ng Hunyo 2022 at malaking taas sa 3.7 percent ng kaparehong buwan ng Hulyo 2021.
“Ang dahilan ng mataas na antas ng inflation noong Hulyo 2022 ay ang mas mabilis na pagtaas ng presyo ng Food and Non-Alcoholic Beverages. Ito ay may 6.9% inflation at 64% share sa pagtaas ng pangkalahatang inflation sa bansa,” pahayag ni Mapa.
Tumaas naman sa 9.2 percent ang inflation sa presyo ng isda at iba pang seafood products mula sa 6.7 percent, ang karne at iba pang meat products ay nagtala rin ng inflation na 9.9 percent mula sa 8.1 percent noong Hunyo, ang asukal, confectionary at mga produktong minatamis ay may inflation na 17.6 percent mula sa 10.9 percent noong June.
Ayon kay Mapa, ang ikalawang commodity group na mabilis ang pagtaas ng inflation ay ang transport index na may 18.1 percent inflation noong Hulyo mula sa 17.1 percent noong Hunyo.
- Latest
