DOTr, planong magtayo ng bagong paliparan sa 4 lalawigan

MANILA, Philippines — Isang opisyal ng Department of Transportation (DOTr) ang nagpahayag na pinag-aaralan na magtayo ng mga bagong paliparan sa may apat na lalawigan sa southern Philippines.

Ayon kay Transportation Undersecretary for Planning and Project Development Timothy John Batan, ang mga bagong paliparan ay plano nilang ipatayo sa Zamboanga, Dumaguete, Masbate at Bukidnon.

Bukod dito, pinag-aaralan na rin nila ang pagtatayo ng mga bagong airports sa iba pang lalawigan at mga bayan.

Aniya pa, magpopokus rin sila sa konstruksiyon ng New Manila International Airport sa Bulacan at sa panukala ng Cavite provincial government na i-develop pa ang Sangley Airport bilang isang international gateway.

Layunin aniya nito na magkaroon ng mas ligtas at mas malawak pa ang maabot ng mga paliparan upang makapag-accommodate ng mas maraming biyahe at mga pasahero.