Mag-asawa todas sa saksak ng anak na ‘sinapian’
MANILA, Philippines — Kapwa nasawi ang mag-asawa matapos na sila ay ataduhin ng saksak ng kanilang sariling anak na umano’y sinapian ng masamang espiritu sa loob ng kanilang bahay sa Barangay Pampang, Kayapa, Nueva Vizcaya, kamakalawa.
Kinilala ng Kayapa PNP ang nasawing mag-asawa na sina Ruben Baltazar, 68, isang magsasaka at Nora Baltazar, 65, habang sugatan naman ang isa nilang anak na si Shayra Baltazar, 26, dalaga at pawang mga residente sa nasabing barangay.
Kinilala naman ang suspek na si Iryb Baltazar, 28, isang magsasaka at residente rin sa nabanggit na lugar.
Ayon sa ulat, alas-3:10 ng madaling araw nitong Huwebes ay mahimbing na natutulog ang mag-asawa sa sala ng kanilang bahay kasama ang suspek nang bigla na lamang itong tumayo na tila sinapian ng masamang espiritu at kumuha ng patalim at pinagsasaksak ang kanyang magulang at kapatid na si Shayra.
Mabilis naman na nakalabas sa bahay si Shayra para humingi ng tulong sa kanilang kaanak at kapitbahay para dalhin sila sa ospital na kung saan hindi na umabot ng buhay ang mag-asawa dahil sa mga tinamong mga saksak sa iba’t ibang bahagi ng katawan.
Boluntaryo namang sumuko sa mga pulisya ang suspek na nahaharap sa kasong parricide at frustrated homicide.
- Latest
