DAR acting chief sinibak sa puwesto

MANILA, Philippines — Isang linggo bago matapos ang termino ni Pangulong Rodrigo Duterte ay sinibak ng Palasayo sa puwesto ang Department of Agrarian Reform (DAR) chief na si acting DAR Secretary Bernie Cruz.

Ayon sa isang memorandum na may petsang Hunyo 20, 2022 ng Palasyo, itinalaga si DAR Undersecretary David Erro bilang Officer-in-Charge ng ahensya hanggang Hunyo 30.

Magugunitang si Cruz ay itinalaga bilang acting DAR Secretary noong Nobyembre 2021 makaraang magbitiw si Secretary John Castriciones sa kanyang puwesto makaraang tumakbo sa Senado.

“Hindi naman po sinibak, by operation of law po parang bypass kami after ng “sine die ” ng Congress. They need to appoint a replacement and Usec. Erro is the head of Transition Committee kaya nilagay na rin po siya na OIC,” paliwanag ni Cruz.

Kaugnay nito, itinalaga naman ni President-elect Ferdinand Marcos Jr. si outgoing Abono party-list Rep. Conrado Estrella III para pamunuan ang DAR. - Malou Escudero